Быракаан сынньалаҥ киинигэр "Сиһик" эбээлэр түмсүүлэрэ тэрийбит Саха АССР 100 сылыгар аналлаах "Ийэ дойдубут устуоруйата - биһиги дьылҕабытыгар" диэн көрсүһүү бэрт сэргэхтик ааста.

Бүгүн Быракаан нэһилиэгэр күнүс 3 чаастан сынньалаҥ киинигэр "Сиһик" эбээлэр түмсүүлэрэ тэрийбит САССР 100 сылыгар аналлаах "Ийэ дойдубут устуоруйата - биһиги дьылҕабытыгар" диэн көрсүһүү бэрт сэргэхтик ааста. Кэпсэтиигэ нэһилиэкпит оскуолатын кэллэктиибэ,аҕам саастаах олохтоохторбут кыттан бэрт интэриэһинэй, туһалаах көрсүһүү буолла. Ол курдук Васильева М.И . аҕатын - учуутал, кыраайы үөрэтээччи, педагогическэй, колхознай тутуу бэтэрээнэ, Үөһээ бүлүү улууһун Бочуоттаах олохтооҕо Васильев И.К. архыыбыттан нэһилиэк историятыттан бэрт элбэх бэлиэтээһини ааҕан иһитиннэрдэ. Нэһилиэк библиотекара Баянаева М.Н. саха уһулуччулаах политига И.Н. Барахов олоҕун оҥкулун кэпсээтэ.Саха Өрөспүүбүлүкэтин, Быракаан нэһилиэгин Ытык кырдьаҕаһа Яковлев Е. Г. нэһилиэк сэрии кэминээ5и олоҕун сырдатта, аҕатын Аҕа дойду улуу сэриитигэр нэһилиэнньэни хоргуйан өлүүттэн быыһаабыт Герасим Михайлович Яковлев туһунан кэпсээтэ. Сэбиэскэй кэм укулаатын өр сылларга үтүө суобастаахтык биригэдьииринэн үлэлээбит нэһилиэк бочуоттаах олохтоо5о Николаев Н.В. сырдатта. Улуус биир кырдьаҕас оскуолата 110 сааьын бэлиэтиир үбүлүөйүгэр бэлэмнэнии үлэ туһунан Быракаан ситэтэ суох орто оскуолатын дириэктэрэ Саввинова А.В., библиотекарь Васильева А.В. билиһиннэрдилэр. Оскуола дьоһуннаах үбүлүөйүн бэлиэтиир тэрээһиннэргэ нэһилиэк олохтоохторун, эбээлэр түмсүүлэрин көхтөөхтүк кыттарга ыҥырдылар, бииргэ улэлииргэ сүбэлэстилэр. 1915 сыллаахха тутуллан үгүс көлүөнэ үөрэхтээх ыччаты иитэн таһаарбыт оскуола дьиэтин Үөһээ Бүлүү улууһун ураты харыстанар өйдөбүнньүк тутуутун курдук сыаналаан, эбии матырыйааллары хомуйан, түмэл дьиэтэ оҥорорго , ол сыалга дьулуһарга диэн көрсүһүү кыттыылаахтара биир санааҕа кэллибит.