Быракаан нэһилиэгэр Үрүҥ тунах ыһыах
Бэс ыйын 15 күнүгэр Быракаан нэһилиэгэр Арассыыйаҕа дьиэ кэргэн, СӨ оҕо -аймах, Үөһээ Бүлүү улууһугар түмсүү сылын чэрчитинэн үрүҥ тунах ыһыах буолла. Ыһыахпыт маанылаах, ытыктабыллаах ыалдьыта алгысчыт Трофим Васильевич Миронов - Бэргэн ыһыахпытын алгыстаан Быракаан нэһилиэгин олохтоохторо, ыалдьыттара санаалыын ырааһырдыбыт. Үгэс быһыытынан нэһилиэкпит баһылыга Оконосов Алексей Арсентьевич биир дойдулаахтарын эҕэрдэлээн, бэлиэ саастарын туолбут нэһилиэк олохтоохторугар эҕэрдэ суруктары, бэлэхтэри туттартаата. Быйыл оскуоланы бүтэрбит оҕолорго ситиһиилэри баҕаран туран , эҕэрдэ суруктары , бэлэхтэри туттартаата. Ыраахтан-чугастан үөрүүбүтүн үллэстэ, биир дойдулаахтарбыт
баҕа санаа бастыҥын этэн- тыынан, истиҥник саныыр дьонноругар бэлиэ саастарыгар бэлэх туттартаан , олус долгутуулаах буолла. Ыһыахпыт эҕэрдэ кэнсиэригэр оҕолуун-уруулуун сайыны уруйдаан - айхаллаан ылбаҕай ырыа да ылланна,үҥкүүлээн да тэйдибит.
Ону таһынан оҕо саас сылын чэрчитинэн оһуокай күрэҕэ ыытыллан ыһыахпытын оҕолорбут оһуокайдаан киэргэттилэр. Араас культурнай , спортивнай тэрээһиннэр ыытылыннылар. Быйылгы ыһыахпытыгар бириистэри биир дойдулаахтарбыт, нэһилиэкпит тэрилтэлэрэ, олохтоохторо , ону таһынан дьиэ кэргэн аатыттан спонсордаан , күрэхтэр, тэрээһиннэр бэрт сэргэх, тыҥааһыннаах буоллулар. Үрүҥ тунах ыһыахпыт тэрээһинигэр ыраахтан-чугастан түмсэн , ыҥырсан спонсордаабыт бар дьоммутугар дьоһуннаах кылааккыт , болҕомтоҕут иһин тэрийээччилэр ааттарыттан махтанабыт! Баҕа санаа бастыҥын аныыбыт! Санаабыккыт санаа хоту сатана турдун, толкуйдаабыккыт табылла турдун!