Олоҥхо ыһыаҕар Быракаан нэһилиэгэр бэлэмнэнии үлэтэ тэтимнэхтик барар.

Олоҥхо ыһыаҕар Быракаан нэһилиэгэр бэлэмнэнии үлэтэ тэтимнэхтик барар. Ол курдук нэһилиэк кулуубун үлэһиттэрэ бу күннэргэ балаҕан ис барааныгар туттуллуохтаах кылынан (сиэлинэн) сөрүө оҥоһугун саҕалаатылар. 15-с Олоҥхо ыһыаҕа Үөһээ Бүлүүгэ ийэ тыл, үйэлээх үгэс, уопсастыба 12-с билим-методическай өрөспүүбүлүкэтээҕи кэмпириэнсийэҕэ сылдьан элбэҕи билэн-көрөн дуоһуйдубут.

Муус устар 7 күнүгэр Үөһээ Бүлүү олохтооҕторо, Өргүөт нэһилиэгиттэн төрүттээх эдьиийдии-балыстыы талааннаах иистэнньэҥнэр Дмитриева Ульяна Афанасьевна, Харахова (Дмитриева) Сардана Револьевна нэһилиэнньэҕэ удамыр сыанаҕа бэйэлэрин өҥөлөрүн олохтоохторго оҥордулар, ол курдук ыһыахха кэтиллэр сахалыы мааны таҥастары быстылар, сүбэ-ама биэрдилэр.

Бүлүү 2-с Күүлэтиттэн төрүттээх мас ууһа Алексей Алексеевич Николаев 4 устуука кытыйалары 4 000 сууммаҕа оҥорон ыытта.

Муус устар 11 күнүгэр күнүс 2 чаастан сынньалаҥ киинигэр М.К. Аммосов аатынан Хотугулуу-Илиҥҥи Федеральнай институт Олоҥхо научнай чинчийэр институтун лингофольклористика секторын сэбиэдиссэйэ, филологическай наука кандидата, «Ыччат Олоҥхоһут» өрөспүүбүлүкэтээҕи түмсүү салайааччыта Юрий Петрович Ааттаах олоҥхоһуттар аартыктарынан, ытык кырдьаҕастар ыллыктарынан диэн ааптарыскай экспериментальнай бырайыагынан «Баһырҕастаах айаннаах баабый Боотур» олоҥхону, 2 чаас 20 мүнүүтэ ааҕан доллоһутан, оҕолор, дьон-сэргэ сэҥээриитин ылыан ылла. Олоҥхоһукка үгэс быһыытынан атах соболоҥор диэн Быракаан нэһилиэгин дьонуттан-сэргэтиттэн махтал сурук, чороон, 3 500 солкуобай уу харчынан туттардыбыт. Дьэ кырдьык даҕаны эдэр киһиттэн талааннаах, сахалыы уус-уран тыл сүмэтин, кэрэтин баһылаабыт, куолас-куолай кэрэтэ-мааныта, сахатынан киэн туттар, чулуу ыччат бэрдэ кэлэн, күн курдук араас сардаҥатынан сандаарда.