«Ийэҕэ махтал» сквер үөрүүлээх арыллыыта
Бу дьыл балаҕан ыйын 5 күнүгэр Үөһээ Бүлүү улууһун Быракаан нэһилиэгэр сабыс саҥа, аныгылыы быһыылаах, ситэриллибит-хоторуллубут тупсаҕай оҥоһуулаах «Ийэҕэ махтал» сквер үөрүүлээх арыйыыта буолла.
Быракаан нэһилиэгэр үс Герой (Алексеева Мария Степановна, Алексеева Ульяна Игнатьевна, Николаева Мария Тарасовна) уонна элбэх оҕолоох чулуу ийэлэрбитинэн киэн туттабыт. Ол курдук маҥнайгы хардыынан Марина Спиридоновна баһылыгынан үлэлии олорон, Герой Ийэлэрбит олорбут түөлбэлэрин «Ийэ Албан аата» уулуссата диэн ааттаан-суоллаан, ийэ үрдүк аатын үйэтитиигэ бастакы хардыы оҥоһуллубута. Саха Өрөспүүбүлүкэтин тыа хаһаайыстыбата биллэрбит 2012-2020 сс. «Тыа сирин биир кэлим сайдыыта» судаарыстыбаннай бырагыраама чэрчитинэн «Олохтоох нэһилиэнньэ бачыымын өйүүр граҥҥа» анаан олохтоох дьаһалта тыа хаһаайыстыбатын специалиһа Васильева Марина Ивановна «Ийэҕэ махтал» сквер тутуутун бырайыагын 2019 с. оҥорбута. Нэһилиэк баһылыга Оконосов Алексей Арсентьевич, дьаһалта үлэһиттэрэ сүүрэн-күтүн үлэлэһэн, бу бырайыак тупсарыллан, чочуллан быйыл үлэҕэ киирдэ.
«Ийэҕэ махтал» сквер
бырайыагын Оконосов Василий Алексеевич салайааччылаах ООО «Охоноос»
тэрилтэ ымпыгар-чымпыгар дылы толкуйдаан, биир дойдулаахтарыгар кэлэр
кэнэҕэски ыччаттарбытыгар биир кэрэ, сүдү суолталаах сквер оҥоһулунна. Сквер силигин ситэрэн «Ийэҕэ махтал» ахтыы кинигэ эбии биир туспа, улахан суолталаах өйдөбүнньук буолла. Бу ахтыы-кинигэ
идиэйэтин, толкуйун Алексей Арсентьевич
тобулбута, сүүрэн-көтөн
дьонугар-сэргэтигэр бэлэх оҥордо. Кинигэҕэ киирбит матырыйаалга олохтоох
кулууп, библиотека, «Быракаан» түмсүү үлэлэстилэр.
Быракаан нэһилиэгин олохтоохторо, ыраахтан-чугастан биир дойдулаахтарбыт, үлэлии-хамсыы сылдьар эдэр исписийэлиистэр биир сырдык санаанан салайтаран, ийэ үрдүк аатыгар сүгүрүйэн «Ийэҕэ махтал» үтүө санаа акцияҕа кыттыһан 350 тыһ. сууммаҕа оҕону көтөҕөн олорор ийэ пааматынньыгын Чочасов Николай Николаевичка оҥотторон өрөгөй үөрүү эбилиннэ. Бу күннэргэ сквер үлэтин уус тарбахтаах биир дойдулаахтарбыт ситигин ситэрэн нэһилиэкпит биир үтүө, кэрэ көстүүтэ буолла.
